კვიპროსის რესპუბლიკა
Contact info
- ვასილისის ამალიას 3, 1101,ნიქოზია, კვიპროსი
- 09:00 – 18:00
- cyprus.emb@mfa.gov.ge
- +357 96808844
დიპლომატიური ურთიერთობების ქრონოლოგია:
საქართველოსა და კვიპროსის რესპუბლიკას შორის დიპლომატიური ურთიერთობები დამყარდა 1992 წლის 9 ივლისს.
2008 წლიდან კვიპროსის რესპუბლიკაში დაფუძნდა საქართველოს საელჩო.
2005-2008 წლებში კვიპროსის გადაფარვა ხორციელდებოდა ისრაელში საქართველოს საელჩოს მიერ.
2005-2010 წლებში კვიპროსის რესპუბლიკა საქართველოს გადაფარვას ახორციელებდა რუსეთის ფედერაციიდან.
2010 წლიდან საქართველოს გადაფარვა ხორციელდება საბერძნეთის რესპუბლიკიდან.
თანამშრომლობის ძირითადი სფეროები:
უკანასკნელ პერიოდში გააქტიურდა თანამშრომლობა საქართველოსა და კვიპროსის რესპუბლიკას შორის. ქვეყნებს შორის ხელმოწერილია რვა საერთაშორისო ხელშეკრულება, რომელიც არეგულირებს თანამშრომლობას ისეთ სფეროებში, როგორიცაა ვაჭრობა, საჰაერო მიმოსვლა, განათლება, მეცნიერება, კულტურა, სამოქალაქო და სისხლის სამართლის საკითხები და დიპლომატიური და სამსახურებრივი პასპორტის მფლობელთათვის უვიზო მიმოსვლა.
ეკონომიკური თანამშრომლობის გაღრმავების მიზნით, 2015 წელის 5 ნოემბერს კვიპროსში შეიქმნა საქართველო-კვიპროსის ერთობლივი ბიზნეს ასოციაცია.
2018 წლის 7 აგვისტოს გამოცემული ეგზეკვატურის საფუძველზე დავით ნარსია გახდა თბილისში კვიპროსის რესპუბლიკის საპატიო კონსული, რომელიც საკუთარ უფლებამოსილებებს განახორციელებს საქართველოს მთელ ტერიტორიაზე.
ისტორიულ-კულტურული ურთიერთობების მნიშვნელოვან ნაწილს წარმოადგენს კვიპროსის დაბა ღალიის ტერიტორიაზე აღმოჩენილი ღვთისმშობლის სახელობის ქართული მონასტერი, რომლის არქეოლოგიური კვლევა 2006 წელს დაიწყო. არქეოლოგიური სივრცე ოფიციალურად 2014 წლის 29 აპრილს გაიხსნა. 2015 წლის 5 დეკემბერს თბილისში გაიმართა კვიპროსში ღალიის სამონასტრო კომპლექსში აღმოჩენილი არტეფაქტების გამოფენა.
2018 წლის იანვარში არქიეპისკოპოს ქრისოსტომოს მეორისა და კვიპროსის მინისტრთა კაბინეტის გადაწყვეტილებით, საქართველოს მართლმადიდებლურ ავტოკეფალურ ეკლესიას, უსასყიდლოდ, სრულ მფლობელობაში გადაეცა 12995 კვ.მ. მიწის ნაკვეთი, სადაც იგეგმება მონასტრის აშენება.
ბმულები:
კვიპროსის რესპუბლიკის საელჩო საქართველოში (რეზიდენციით ქ. ათენი)
კვიპროსის რესპუბლიკის საგარეო საქმეთა სამინისტრო